சில நேரங்களில் சில வலிகள் ,

சில நேரங்களில் சில வலிகளை, 
தாங்கித்தான் ஆகவேண்டும். 
ஒருவரின் வலி மற்றொருவர் வழி. 
எனக்குத் தெரிந்தே, 
நான் தொலைந்து போனேன்; 
சந்தையில் நிர்ணயிக்கப்பட்ட விலையில், 
என் வாக்குகள் விலைபோயின! 
உன் வாக்குகளும்தான், 
உனக்குத் தெரிந்தே, 
ஒரு விலைக்கு உன்னை கடத்தின. 
உணவுப்பொட்டலங்களுக்காக, 
ஊர்மாறிக் கூடினோம்; 
இஷ்ட திரவங்கள் நம்மை திடமாக்கின! 
ஐந்தாண்டுகளில் ஒருமுறை மட்டுமே, 
நிர்ணயிக்கப் படும் நமது விலை, 
வலிக்கத்தான் செய்கிறது. 
சில நேரங்களில் சில வலிகளை 
தாங்கித்தான் ஆகவேண்டும். 
பொய்களை நாம் கண்டுகொள்வதில்லை. 
ஊழலின் கூடாரத்தில், 
ஐந்தாண்டுக்கொருமுறை, 
நீயும் நானும் இளைப்பாறுகிறோம் என்பது, 
சற்று வலிக்கத்தான் செய்கிறது. 
ஆனாலும் சில நேரங்களில் சில வலிகளை, 
நாம் தாங்கித்தான் ஆகவேண்டும். 
                                   ப.சந்திரசேகரன் .