திமிறல்கள்

கருவறையின் திமிறல்கள் தாய்மைக்குக் கொண்டாட்டம்;
குழந்தையின் திமிறல்கள் குடும்பத்தின்  கொண்டாட்டம்; 
இளமையின் திமிறல்கள் இணைபவர்க்குக் கொண்டாட்டம்; 
இல்லறத்தின் திமிறல்கள் அகமகிழும் கொண்டாட்டம்.
சுமையேற்கும் திமிறல்கள் சுகம்காணும் மரபாகி 
வாழும்நாள் ஒவ்வொன்றும் வகைவகையாய்த் திமிறிடுமாம்!
வயதோடு வம்பிழுத்துத்  திமிறலெல்லாம் திணறி 
தரைதொடும்  வானமென நிலம்சாய்ந்துத் திமிறிடுமாம் ! 
நிமிர்ந்துநின்ற நடுமுதுகை நிமிடங்கள் கேலிசெய்ய 
அமிழ்ந்திடும் வேளையிலும் அரைநாழிகைத் திமிறிடுமாம்!
பாதங்களின் புரட்சியெலாம் பாதிவழி தடம்புரள, 
மீதிவழித் திமிறல்கள் மறுதலையின் கொண்டாட்டம்.
தவணையிலே திமிறல்கள் தலைக்கேறி குடைசாய,
எமனோடும்  திமிறுகையில்,சிதையிழக்கும் கொண்டாட்டம். 
ப.சந்திரசேகரன் .