இரவும் பகலும்

இளமை இருக்கையில்

இரவைப் பகலாக்கலாம்.

முதுமையின் முனகல்

பகலை இரவாக்கும்.

மேகங்கள் இருண்டுவர,

பகலுக்கு போர்வையிடும்.

இரவின் இருளை

பவுர்ணமி இறக்கிவிடும்.

பகலிலும் இரவிலும்,

பலப்பல கனவுண்டு.

பகல்கனவு பலிக்காதெனில்

இரவின் கனவுகள்

பகலில் பலிக்குமோ?

வெளிச்சத்தில் குளிக்கும்

பளிச்சிடும் இரவுகள்

இருட்டறைப் பகலினை

இரட்டிப்பு ஆக்குமோ?

இரவுக்கும் பகலுக்கும்

ஒருநாளும் இறப்பில்லை.

இறக்கும் பொழுதுகள்

இரவாயினும் பகலாயினும்

உயிர்களின் ஓய்வீற்கு

செயற்கரிய செய்யுமாம்.

இரவு பகல்பாரா

கருணைமிகு உழைப்பில்

அரும்புவது உயர்வாம்.

பாரியின் தேரினால்

முல்லை பிழைத்தது

பாரினில் பொழுதுகள்

பகலென இரவென

வல்லுயிர் ஓம்பும்.

தில்லையில் சிவனோ

நெல்லையில் சிவனோ

எல்லைத் தெய்வமாய்

இரவிலும் பகலிலும்

பல்லுயிர் காத்திடும்

பொழுதுகள் பலவும்,

தொழுதிடும் திசைகளே!

ப.சந்திரசேகரன்.

எண்பதை எட்டும் இந்தியா.

இனிய சுதந்திரத்திருநாள் வாழ்த்துக்கள்.

======================================

எண்பதை எட்டுது எம்தசேச் சுதந்திரம்.

முன்பகை நீக்கிட,முயலட்டும் தந்திரம்.

அன்புடன் இயங்கட்டும் அரசு இயந்திரம்.

தன்பலம் கூட்டலே தரணியில் நிரந்தரம்.

பேச்சின் பெருஞ்சுவைப் பெருமிதம் மொழியே!

மூச்சுக் காற்றதன் தூய்மையின் வழியே,

ஏச்சினைக் குறைத்திடின்,இறங்கிடும் பழியே;

மாச்சர்யம் கடக்கும்,மொழியதன் விழியே!

படிக்கும் பாடங்கள் பழையதும் புதியதுமாய்,

இடித்தும் இசைத்தும் இயக்கிடும் சமத்துவம்.

தடித்ததோர் ஆணவம் தன்னிலை அறிந்திட,

துடித்திடும் உண்மை உயர்த்தும் உரிமையை!

உரிமைகள் உயர்ந்து ஔியினை கூட்டி

சரியெது தவறெது,நற்சான்றுடன் கூறும்!

பரிவினைப் பெருக்கும் பயிரே,சுதந்திரம்.

பிரிவினை போக்கும் பசுமையே, சுதந்திரம்!

ப.சந்திரசேகரன்.

கதவு

கனவுக்கு கதவுகள் பல உண்டு.

கதவுக்கு கனவொரு களம் இல்லை.

திறப்பதும் மூடுவதும் கதவின் இலக்கு.

திருட்டுகள் நடந்திடின் அது விதிவிலக்கு.

பதவிக்கு கதவுகள் நாள்தோறும் பலவாகும்.

உதவிக்குத் தட்டுதல் மானுட மரபாகும்.

பிறப்பின் கதவுகள் திறப்பது தலைகீழாம்.

இறப்புக்கு கதவு காட்டும்வழி கால்முன்பாம். 

கூற்றினில் குலுங்கிடும் குறுமதிக் குணமென, 

காற்றினில் ஆடிடும் பழுதுற்ற பழங்கதவு.

நாதாங்கித் தாங்கும் கதவு வீழ்வதில்லை.

நாதாங்கும் சொல்வீழ,நற்குணம் நிற்பதில்லை!

உடலின் கதவிற்கு நோயே விருந்தாளி;

படரும் நோய்கள் கதாவாகும் மருந்திற்கு.

நோயும் மருந்தும், மனக்கதவின் மரக்கூலி.

தேயும் நம்பிக்கை துரத்திடும் மனக்கதவு.

மனக்கனவு திறப்பதோ மகிழ்ச்சியின் கதவு.

மனக்கணக்கு தோல்வியுற,அடையும் மதிக்கதவு.

கனவில் கதவெல்லாம் வானுக்கு வழிகாட்டும்;

கதவில்லா வாழ்விற்கு கனவுகளே கதவாகும்.

ப.சந்திரசேகரன்.