உண்டியல் உடைந்திட

கற்றைக் கற்றையாய் சேர்த்த பணத்தில் 

கற்றதும்,கறந்ததும்,கசங்கிடும் காகிதம்; 

மற்றவை பலவும்,மக்கிடும் பொருளாம்;

உற்றுச் சேர்த்த உண்டியல் உடைந்திட 

சுற்றிச் சிதறிடும் காசுகள் போலவாம், 

வற்றி வெடித்திடும் ஆசைகள்  எல்லாம்.

வெற்றிடம் ஒன்றே விளங்கா விடையாம்..

தோற்றமும் மறைவும் தேதிகள் கணக்கே! 

நேற்றைய பாடம் இன்றைய பழங்கதை; 

நூற்றுக் கணக்கில் நெரித்திடும் நிகழ்வினில்  

மாற்றிடக் கூடுமோ மலையெனும் குறைகள்? 

முற்றிய  கதிர்களே,மண்ணைத் துறக்கும்.

உற்றதோர் உயிரோ,ஊனெனும் கதிரினை, 

மற்றொரு நாளில் மண்ணுடன் சேர்க்கும்!   

ப.சந்திரசேகரன்.