நன்மை தரும் நாள்.14/04/2017

            நன்மை தரும்  நாள்.14/04/2017

          {இனிய சித்திரைத் திருநாள் வாழ்த்துக்கள்} 

போர்க்களம் பலவாம் பூமியில் இன்று;

யார்ப்பகை வெல்வது,  யாரறி வாரோ?

வேர்ப்பகை படர்ந்து, வாய்மை வற்றிட,

வார்ப்பது எதுவோ, வினையோ விதியோ ?

ஊர்ப்பகைக் களைந்து, ஒருமனம் ஊன்றி,  

தேரிழுப் போரின்  தெருவுகள் திளைக்கும்.

சீர்தரும் நாளில் சேர்ந்திடும் கரங்களால், 

சார்ந்திடும் சமூகம் சரித்திரம் படைக்கும்.

கூர்மதிக் குற்றம் துலக்கிடும்  அறிவினில்,

கார்முகில் ரகசியம் திரையென விலகும்;

நேரடிக் காட்சியாய் நிகழ்வுகள் கண்டிட,

சோர்விலாச் சுடரொளி, சுற்றிப் பரவிடும் .

தீர்த்திட இயலா, தீமையும் கொடுமையும்,

தீர்ப்பினில் கரைந்திட, தேய்பிறை யாகும்; 

பார்ப்பவை  பார்வையின் நன்மைக ளென்று,

ஈர்ப்புடன் இணைவோம், அகப்பகை வென்று.

                                                                  ப.சந்திரசேகரன்.