பொங்கல் திருநாள்.14/01/2017

   

                    பூரிப்புப் பொங்கல். 

ஒருவராய் நின்றிடின்,  ஊரென்ப துண்டோ!

பருவம் பலதும், கூடிடும் வாழ்வில்,

இரவினை இருளும், பகலினை ஒளியும்,

நெருங்கிடாப் பொழுது நாளென் றாகுமோ!

எருவும் மண்ணும் கலந்திடா  திருப்பின்,

பெருகுமோ பூமியில் பசுமையின் பாங்கு;

பிரிவின் பொருளது, தனிமையின் வலியாம்;

புரிந்திடின் ஆறுமாம், பூசலின் காயம்.

அரிதெனக் கிட்டிய மானுடப் பிறவியில்,

ஆர்த்தலில் அடங்குமோ, ஆளுமைத் தேர்ச்சி !

நேர்ந்திடும் நன்மைகள் நிறைவுடன் தங்கிட,

ஊர்ந்து சென்றாலும்,ஒருவழிச் செல்வோம்.

பார்த்தலும் கேட்டலும் பலபெருள் கூறிட,

நேரில் அறிந்திடும் நன்மைக் காட்சியே,   

ஊரையும் உலகையும் உயர்த்திடும் என்று,

பூரித்துத் திளைத்திட, பொங்கிடும் திருநாள்.

                                                                 ப. சந்திரசேகரன்.